На неотповикливата оставка на косовскиот премиер Рамуш Харадинај реагираше и албанскиот претседател Илир Мета.
Преку пост на Фејсбук Мета изрази убеденост во невиноста на Харадинај и нагласи дека „не постои притисок кој може да го скрши државникот и национален херој”.
– Горд сум на Рамуш Харадинај и убеден во неговата невиност. Не постои притисок кој може да го скрши државникот и народен херој. Од денеска сите треба да спиеме помалку, да се загрижиме повеќе и посилно да се обединиме Косово и нашиот регион да не бидат под закана на мирот, безбедноста и европската иднина, напиша Мета.
Во врска со оставката реагираа и актуелни и поранешни партиски лидери и министри, кои оценуваат дека тоа е чин на вистински државник и веруваат дека повторно ќе биде потврдена неговата невиност.
Нема реакција од премиерот Еди Рама, кој не е во добри односи со Харадинај, поради поддршката на Рама за идејата на косовскиот претседател Хашим Тачи за промена на границите и размена на територии меѓу Косово и Србија, на што остро се спротивставува Харадинај.
