Околу 6.000 стари лица над 65 години кои немаат други извори на егзистенција се очекува да бидат опфатени со Законот за социјална сигурност на стари лица кој веќе стапи во сила.
Тие ќе бидат социјално обезбедени, односно ќе земаат месечен надоместок од околу 6.000 денари.
Право на надоместок имаат сите лица кои се државјани на Република Македонија најмалку 15 години и не примаат старосна пензија, вклучувајќи ги и лицата без ден работен стаж.
– За домаќинствата кадешто и мажот и жената ги исполнуваат условите за користење на социјална сигурност, надоместокот ќе го користи само еден член бидејќи станува збор за право од социјалната заштита и не е поврзано со пензиското и инвалидското осигурување, појаснуваат од Министерството за труд и социјална политика.
Оттаму информираат дека од денеска стартува и поднесувањето на барањата за сите нови права што се воведуваат со социјалната реформа, како што е и правото за надоместокот за социјална пензија.
