Состојбите со трагичен исход, како загинувањето на трите деца во пожарот во Велес, треба сите да не загрижат, а особено надлежните органи вклучително и Министерството за труд и социјална политика и надлежните центри за социјална работа, оцени денеска заменик народниот правобранител Васка Бајрамовска-Мустафа.
– Во нашите годишни извештаи многу често укажуваме на потребата од еден поинаков систем на социјална заштита кој ќе биде навистина достапен на оние на коишто им треба. Систем во кој социјалните и други работници ќе бидат повеќе на терен и непосредно ќе ги утврдат состојбите за да можат благовремено да им помогнат на граѓаните. Ако се точни наводите дека семејството од Велес било во ризик и корисник на социјална заштита тоа значи дека тимот којшто го следел овој предмет морал да знае што се случува во семејството. Тоа би требало да биде најнормалната работа на еден центар за социјални грижи, за благовремено да преземе мерки да превенира каква било траума, вклучувајќи го и ова што се случи, рече Бајрамовска-Мустафа во одговор на прашање на денешната прес-конференција.
Таа нагласи дека многу често се случува родителите во потрага по изнаоѓање на дополнителни материјални средства да заборават на она што се нарекува постојана родителска грижа и додаде дека социјалната парична помош што ја обезбедува државата е под секаков минимум за да може едно семејство да опстои.
– Тоа не ги амнестира родителите, но од друга страна уште поголема е обврската на надлежните органи преку навремени и континуирани советувања и следење на родителите и на семејствата и со преземање мерки да превенира такви состојби. Очекувам Министеството за труд и социјална политика сериозно да го испита постапувањето и да преземе соодветни мерки за евентуални пропусти, нагласи Бајрамовска- Мустафа.
