(Реакција на соопштението на Здружението на штедачи на „Еуростандард банка“, објавено на 18 јануари 2021 година)

Почитувани, со цел правилно информирање на јавноста, Народната банка ве известува за следново: „Народната банка и гувернерката на Народната банка, Анита Ангеловска-Бежоска, целосно ги отфрлаат неточните наводи и квалификации во соопштението на Здружението на штедачи за начинот на постапување на Народната банка и гувернерката во случајот на „Еуростандард банка”.

Ова се истакнува во реакцијата од НБ на вчерашната објава од Здружението на оштетени штедачи од Еуростандард банка. Во продолжение ја објавуваме целата реакција од НБ:

Како што беше укажано во повеќе наврати досега, Народната банка, врз основа на наодите на супервизорските тимови, има изречено голем број супервизорски мерки кои биле соодветни на состојбите во банката. Конкретно, од 2013 година, па сѐ до одземањето на дозволата во август 2020 година, изречени се околу 70 супервизорски мерки.  Само во последните две години, откако гувернерката Ангеловска-Бежоска ја извршува оваа функција, изречени се околу 40 супервизорски мерки.

Напоменуваме дека Народната банка не одобрува кредити, туку тоа го правеле органите на „Еуростандард банка“. Токму поради констатиран зголемен кредитен ризик од кредитите одобрени од овие органи на Банката, за да го заштити нејзиниот биланс, Народната банка побара да се изврши докапитализација на Банката. Исто така, побарана и направена беше целосна промена на органите на Банката. 

Не е точно тврдењето дека Народната банка и гувернерката имале докази за перење на пари од страна на Банката и за тоа не ги известиле надлежните органи, како и дека тоа првпат е сторено по затворањето на Банката. Напротив, Народната банка за сите индиции во овој домен навремено ги известила државните органи кои имаат надлежност и експерти за утврдување и натамошно постапување.

И во оваа прилика потсетуваме дека сите релевантни меѓународни финансиски институции и домашни експерти посочија дека Народната банка, како професионална и независна институција, во случајот на „Еуростандард банка“, постапила соодветно и навремено.

Со почит, Кабинет на гувернерот Односи со јавноста