Италијанскиот дизајнер Џорџио Армани претстави нова колекција на париската Недела на високата мода, којашто беше обележана со блескави модели во гламурозен стил.
Пред ограничен број гости, моделите прошетаа низ просториите на Италијанската амбасада во Париз, покажувајќи ја линијата за есен – зима во којашто доминира облека во небесно-сини и сребрени нијанси, заедно со црни кадифени јакни… Армани (86), ги покажа новите слоевити фустани во пастелни нијанси, потоа – вечерни тоалети украсени со вештачки дијаманти, наметка изработена од „пајакова“ мрежа од бисери…
Како и другите врвни брендови за време на корона-пандемијата, и Армани комбинираше ревија во живо со снимен дисплеј-материјал. Неделата на висока мода во Париз трае до 8 јули.
