На територијата на ЕУ денеска стапува во сила Европскиот закон за пристапност (ЕАА) со што клучните производи и услуги, како што се телефоните, компјутерите, електронските книги, банкарските услуги и електронските комуникации мора да бидат достапни и за лицата со попреченост.
– Во ЕУ живеат околу 100 милиони луѓе со попреченост. Пристапноста е предуслов за учество во општеството. Европскиот закон за пристапност е мерка за праведност и правда, но исто така и за раст и иновации, порача еврокомесарката за еднаквост, подготвеност и справување со кризи Хаџа Лабиб по повод стапувањето во сила на Законот.
Според неа, одредбите од овој Закон претставуваат понатамошен чекор со кој на лицата со попреченост низ цела ЕУ им се овозможува да уживаат во своите животи на ист начин како и оние кои се без попреченост.
– Додека го славиме ова достигнување, да го спроведеме во дело осигурувајќи се дека овие нови правила ќе донесат вистинска и трајна промена за сите, додаде Лабиб.
Целта на законот е намалување на бариерите со кои секојдневно се соочуваат лицата со попреченост со што ќе им се олесни целосно учество во општеството, овозможувајќи им вработување со користење на достапна ИТ опрема и помошни технологии, како и поголема мобилност низ цела ЕУ.
Законот поставува заеднички барања за одредени производи и услуги, како што се фонтови со соодветна големина, системи за претворање на текстот во говор на услужните терминали, инсталирање на електронски читачи и адаптирани паметни телефони.
Со законските одредби се предвидува и поедноставување на правилата што важат за економските оператори кои досега се соочуваа со различни и честопати контрадикторни барања за пристапност.
Фото: Европска комисија
