Генералниот директор на „ТАВ Македонија“, Алпер Ерсој на свеченоста организирана по овој повод изјави дека првично авионската линија ќе се реализира двапати седмично, а веќе од наредниот месец „Визер“ од Охрид кон Виена и обратно ќе сообраќа трипати во текот на неделата.
– Преку оваа линија, „ТАВ Македонија“ не само што ја проширува својата мрежа авионски линии кон аеродромот „Свети Апостол Павле, туку истовремено Австрија ја отвара како нов дојдовен пазар за патници и туристи на Охридското Езеро. Очекуваме преку овој лет да привлечеме повеќе туристи од Австрија, така што барем во летните месеци авионската линија кон Виена да биде пофреквентна, рече Ерсој најавувајќи дека „ТАВ“ ќе продолжи да ги промовира Охрид и Македонија пред тур-операторите и авиокомпаниите.
Покрај сезонските, авиолинијата Охрид-Виена ќе биде третата редовна авиолинија од охридскиот аеродром, заедно со веќе воспоставените кон Цирих и Базел. Директна авионска линија од Охрид има и кон Лондон, но поради послаб интерес таа е во мирување до 2 април идната година.
