ОМИКРОН ГИ ПРЕПОЛНИ БОЛНИЦИТЕ ВО САД СО ДЕЦА: „Стапката на позитивни е толку голема, што не ги знаеме последиците!“

Минатата година ова време, Клаудија Хојен, специјалист за детски инфективни болести во Кливленд, се сеќава како гледаше во морничаво празната болница додека се приближуваше Божиќ. Со затворени многу училишта и откажани активности, повеќето деца беа заштитени од коронавирусот. Денес, речиси секој кревет е зафатен, пишува Вашингтон пост на 24 декември во текст посветен на корона вирусот и Омикрон меѓу децата, нешто што кај нас се сфаќа прилично лесно.

„Ние сме во тешка ситуација“, изјави Хојен, од Универзитетската болница Rainbow Babies & Children’s Hospital. „Со Омикрон, сега го имаме овој нов наплив“. Додадете ги на тоа нормалните случаи на грип, скршеници на коски, закажани третмани за деца со рак и други состојби, рече таа, и болницата е „во криза“.

Со оглед на тоа што Соединетите Држави влегуваат во третата година од пандемијата, предвидувањата се дека не чека уште една тешка зима, со тоа што овој пат, освен возрасните, погодени се и децата. Педијатриските хоспитализации за Ковид се зголемуваат во многу делови од земјата, заедно со пристигнувањето на Омикрон – од понеделник, доминантниот вид во Соединетите Држави – со околу 800 нови приеми секој ден во последните три дена.

Особено тешко се погодени Охајо, Тексас, Пенсилванија и Њујорк. Од четвртокот (23 декември), имало 1.987 потврдени или сомнителни педијатриски пациенти со Ковид-19 хоспитализирани на национално ниво, што е скок од 31 отсто за 10 дена, според анализата на Вашингтон пост.

Од почетокот на пандемијата, скоро 7,4 милиони деца и адолесценти се заразени, со уште 170.000 плус само во последната недела, според Американската академија за педијатрија.

Американските лекари интервјуирани оваа недела рекоа дека иако забележуваат рекордни позитивни резултати од тестовите за коронавирус кај децата, огромното мнозинство од случаите досега биле благи и многу личат на обична настинка. Навистина, неколку студии, вклучително и некои објавени оваа недела во Шкотска и Англија, сугерираат дека Омикрон испраќа помалку луѓе во болница.

Но, вработените во јавното здравствое беа во состојба на висока готовност заради децата под 5 години, кои се последната група која не е подобна за вакцини во Соединетите Држави. Претходно овој месец Јужна Африка објави податоци за голем број случаи на деца примени во болница од таа возрасна група. Точноста и значењето на податоците за Јужна Африка се нејасни, но во четвртокот, и Обединетото Кралство објави податоци кои покажуваат скок во приемите и за таа возрасна група.

Колку за споредба, до 19 декември просекот на примени деца во болница бил 3,64 на 100.000 за деца на возраст од 0 до 4 години – трипати повеќе од стапката за оние на возраст од 5 до 14 години. Тој тренд се уште не е евидентен во САД. Лекарите и официјалните лица во осум детски болници во области со зголемени инфекции изваиле дека повеќето од нивните пациенти се невакцинирани адолесценти со одредени здравствени состојби, како што беше случај во поголемиот дел од пандемијата.

Сепак, Арон Глат, шеф за заразни болести на планината Синај, Јужен Насау, призна дека колегите го следат „сигналот“ за можно зголемување на хоспитализацијата на деца под 2-годишна возраст:

Иако тежината на болеста предизвикана од Омикрон се смета за полесна, педијатрите стравуваат дека повеќе деца може да бидат примени во болниците во наредните недели со оглед на огромната бројка што веројатно ќе бидат заразени…

…Во март 2020 година, кога првиот бран на коронавирусот ги погоди Соединетите Држави, првичната презентација на Ковид кај децата имаше тенденција да биде донекаде различна – при што многумина пријавија главоболка, стомачна болка или губење на мирис или вкус. Со Омикрон, лекарите опишуваат помешани симптоми кои се слични на настинка и грип. Во Обединетото Кралство, здравствените власти објавија дека повеќето деца со омикронски инфекции имале главоболки, болки во грлото, назална конгестија и треска, а тие симптоми обично траат околу три дена.

Но, во Мериленд, педијатарот Арон Милстон од Медицинскиот факултет на Универзитетот Џон Хопкинс вели дека посетите за итни случаи се екстремно високи, а неколку од децата биле толку болни што морало да бидат примени во болница.

Тој забележал дека кај децата со инфекции од Омикрон повеќе се јавува треската, отколку со минатите варијанти и ги повика родителите кои имаат деца со симптоми на „настинка“ да претпостават дека „тоа е Омикрон додека не се докаже спротивното“.

„Родителите треба да препознаат дека има настинка и грип и РСВ“, рече Милстон (РСВ е респитарона болест од друг вид, н.з). „Но, во моментов доминантната причина за симптомите кои изгледаат како настинка е веројатно Ковидот“. Епидемиите на респираторни заболувања, како настинката и грипот, имаат тенденција најтешко да ги погодат младите и постарите. Проблем кај бебињата и децата од предучилишна возраст е што тие имаат помалку одбрана за да се борат против странските напаѓачи, изјави Пети Менинг, началник на персоналот во Медицинскиот центар на детската болница во Синсинати.

„Не станува збор само за незрелиот имунолошки систем“, рече таа, „туку и за тоа како децата кашлаат и се справуваат со секретот и телесната температура понеефикасно од возрасните, што ги прави поверојатно да бидат погодени од настинки и грип. Со претходните варијанти на коронавирус, се чини дека имаше нешто што ги пштити младите. Што е тоа, останува една од најголемите научни мистерии за коронавирусот дури и сега, по две години откако Светската здравствена организација првпат го алармира светот за новиот вирус.

Но, сега, повеќето од медицинските центри во САД контактирани оваа недела рекоа дека доживуваат рекорден обем и стапки на позитивност кај децата во нивните болници и во амбулантските клиники. Во Охајо, каде што опколените здравствени установи неодамна објавија оглас во весник на цела страница со зборот „Помош“, а гувернерот распореди скоро 1.200 членови на Националната гарда да постават места за тестирање и да му помогнат на медицинскиот персонал, педијатриските случаи се зголемуваат.

Роберт Мек Грегор, главен медицински лекар за детската болница Акрон, рече дека стапката на позитивност е толку висока што „не ги знаеме последиците“. Од средата, болницата прими неколку деца под 5 години, вклучително и два потврдени случаи кај доенчиња и два сомнителни случаи кај деца на возраст од градинка, но повеќето од другите 11 беа тинејџери. „Постои чувство дека децата напредуваат побрзо до тешка болест“, рече тој.

Натан Хагстром, претседател на педијатрија во здравствената мрежа Лехај Вали, која управува со болниците во регионот Алентаун-Бетлеем во Пенсилванија, рече дека 20 до 30 проценти од тестовите за коронавирус кај деца и адолесценти на училишна возраст се позитивни. Тој процени дека приближно две третини се симптоматски. Хоспитализацијата на децата е двојно поголема од онаа при претходниот пик минатата зима и највисока од пандемијата, но сепак претставуваа мал дел од сите заразени, рече тој.

Тој додаде дека иако голем број деца до 5-годишна возраст се позитивно тестирани, засега „се чини дека тие не се разболуваат или немаат потреба од какви било интервенции или третмани“.

Во Хјустон, хоспитализацијата кај децата со Ковид се удвои во изминатата недела и над 20 проценти од децата во амбулантските клиники се позитивни на вирусот. „Тоа е едноставно лудо“, рече Стенли Спинер, главен медицински потпретседател во Детската педијатрија во Тексас и Детската итна грижа во Тексас.

„И ние очекуваме тие бројки да се зголемат во текот на следните неколку недели“. Спинер рече дека инфекциите се јавуваат и кај вакцинираните и кај невакцинираните деца – при што повеќето од оние кои се вакцинирале имаат „многу помалку значајни симптоми“…

Во Питсбург, Ендрју Новалк, лекар за педијатриски инфективни болести во детската болница UPMC, изјави дека внимателно ги следи вестите од земјите погодени со Омикрон пред Соединетите Држави. Иако податоците од Данска и Обединетото Кралство се смирувачки, тој рече дека е можно податоците од Јужна Африка да ги одразуваат разликите во нутритивниот статус на нејзините деца и стапките на разни болести таму, меѓу другите фактори, кои можеби не се применуваат во Соединетите Држави.

„Ги гледам податоците за Јужна Африка“, рече тој, „и кажувам многу молитви“.

Додека педијатрите се борат со Омикрон, многумина се подготвуваат и за последователни ефекти. Оние во клиниките за ковид на долги патеки во многу болници – веќе преплавени од пациенти кои страдаат од долготрајни симптоми по благи делта инфекции – очекуваат повеќе деца во наредните месеци. Во Rainbow Babies & Children’s Hospital, едно прашање кое се надѕира беше за реткиот пост-вирусен мултиинфламаторен синдром, или MIS-C, поврзан со Ковид, кој се појавува кај некои деца четири до шест недели по инфекцијата. Заклучно со 30 ноември, најновите податоци достапни од Центарот за контрола и превенција на болести, велат дека има 5.973 случаи и 52 смртни случаи кои ја исполнуваат дефиницијата за случаи MIS-C. Научниците не се сигурни што го предизвикува синдромот, но неговата непредвидливост – повеќето од децата се здрави без други хронични состојби – и ненадејноста со која се појавува, ги натера лекарите и родителите да бидат подеднакво вознемирени.

Една студија, објавена во септември во Журналот за алергија и клиничка имунологија, покажа можен генетски маркер што може да го направи детето подложно на оваа состојба, но тоа во никој случај не е целосна приказна бидејќи маркерот не е присутен кај сите пациенти, рече Рандолф…

Лекарите не се сигурни до кој степен треба да очекуваат нови случаи на MIS-C. Во многу други делови од земјата, тешките случаи не се остварија во пропорциите што се очекуваа по делта бранот. Научниците не се сигурни дали тоа е поради повеќе вакцинирани или поради изложеност на претходни варијанти. Сепак, Хојен, специјалист за педијатриски инфективни болести, предупреди дека MIS-C не исчезнал: „Имавме два приеми само оваа недела“. А, прерано е, рече таа, да се знае за Омикрон.