Унгарскиот премиер Виктор Орбан денеска изјави дека италијанската премиерка, Џорџа Мелони, е негова христијанска сестра и дека културниот идентитет игра сè поголема улога во европската политика.
„Таа не е само (моја) колешка, таа е и моја христијанска сестра“, им рече Орбан на новинарите на маргините на економскиот форум ТЕХА во северна Италија, пренесе Ројтерс.
„Споделувањето на културните корени претходно не играа голема улога во европската политика, но сега се приближуваме кон нова ера“, додаде унгарскиот премиер.
Мелони и Орбан се согласуваат за низа прашања, вклучително и потребата од построги имиграциски политики и одбраната на традиционалните семејни вредности, соопшти агенцијата.
Орбан изјави и дека средбата меѓу рускиот претседател Владимир Путин и украинскиот претседател Володимир Зеленски е секако можна и неопходна, пренесе Анса.
Сепак, тој додаде дека „нема волја за постигнување мир и од Киев и од Москва, бидејќи и двете страни се убедени дека времето ќе игра во нивна корист“.
„Мислам дека мировната мисија е неопходна“, подвлече тој повторно потсетувајќи на неговите недамнешни патувања во Москва и Пекинг кои не беа одобрени од ЕУ, нагласувајќи дека има потреба од дијалог со Украина, но и со Русија.
Според него, ако се чека мировниот план да биде прифатлив за двете страни, никогаш нема да има мир, бидејќи првиот чекор не е мир, туку прекин на огнот.
„Во Европа има огромна литература за тоа како да се постигне мир, а оваа богата литература се однесува на дијалогот, кој доколку не се случи во вистинско време, ескалацијата расте и се станува потешко“, истакна Орбан.
