Реципроцитетот на компромисите во меѓународните односи очигледно не беше одлика на функционерите од минатата Влада, а наративот на оние кои сега се во заминување и ги предаваат функциите на нивните наследници најавува продолжување на истата несразмерна попустливост во односите со соседите.

Министерот за правда Бојан Маричиќ по предавањето на неговата функција на Никола Тупанчески најави дека политиката на немешање во внатрешните работи на соседите ќе продолжи и со новиот владин состав.

– Изјаснувањето и дефинирањето на тоа каква етничка заедница егзистира во која било од државите во регионот мислам дека не би било продуктивно во овој момент, ние се водиме од европски принципи и практики и тоа ќе остане така, тоа е наша уставна обврска, рече министерот Бојан Маричиќ одговарајќи на новинарско прашање на денешната прес-конференција со германската министерка за Европа, Ана Лирман.

И досега, нагласи тој, имавме пракса на немешање во внатрешните прашања на која било наша соседна држава.

– Тоа ни е обврска од Уставот, така што не е на С. Македонија каде и какво малцинство има во регионот, тоа е внатрешно прашање на сите држави во регионот, вклучувајќи ја и Бугарија, а секоја група на луѓе, етничка заедница или пак политичка партија или здружение имаат право да ги бараат своите права преку Советот на Европа, Европскиот суд за човекови права или Европската конвенција за заштита на човековите права, рече Маричиќ.

Во однос на прашањето за работните групи, како и за историската комисија, Маричиќ вели дека сето она што е досега направено, односно досегашните напори, ќе бидат вградени во наредната рамка.

– Би се формирале повеќе комисии, тоа значи би имало повеќе луѓе, институции, фактори или актери вклучени во процесот, но не мислам дека во делот на Историската комисија, иако се уште не сме договориле, јас претспоставувам таа ќе остане и ќе продолжи да функционира, во која форма ќе видиме, но тоа е всушност Комисија утврдена во билатералниот договор за пријателство и добрососедство што сме го растификувале во 2017 година. Сите луѓе кои биле вклучени и се што е направено ќе продолжи, рече Маричиќ, посочувајќи дека за нас е важно процесот да продолжи да биде искрен, конструктивен и пријателски со цел да се изнајде решение.