Оградата околу Владата која беше поставена од страна на поранешниот премиер Никола Груевски беше отстранета по доаѓањето на власт на Зоран Заев, бидејќи, како што рече тој – Владата е на сите и треба да биде отворена. Меѓутоа, веќе неколку месеци, Владата наместо со железна, е опколена со полициска ограда, се истакнува во репортажата на ТВ 21.
Но, сегашната Влада го прави спротивното од оваа изјава, а на прашањето зошто полициската ограда веќе со месеци стои тука, ни одговорија кусо:
– Полициската ограда служи за безбедносни потреби при одржување на јавни собири, велат од Влада.
По овој краток одговор, побаравме уште еднаш да ни објаснат – за која цел оградата стои таму веќе неколку месеци, а не за што служи, но не добивме повратен одговор.
Потсетуваме дека Заев со отстранувањето на оградата најави дека има креативни планови.
Од оваа изјава поминаа речиси пет години, а од Влада велат дека оградата сѐ уште се чува во магацинот на касарната „Илинден“ во Скопје.
– Оградата која порано ја оградуваше Владата се чува во магацински простор во касарната „Илинден“ во Скопје. Кога ќе има одлука околу понатамошна намена, благовремено ќе ја известиме јавноста, посочија од Владата.
Инаку, со полициска ограда е опколено и Собранието на Македонија.
