Чешкиот претседател Петр Павел денеска на Денот на победата, 80 години од крајот на Втората светска војна, изјави дека денес во светот постојат елементи што ја предизвикале таа најстрашна војна и дека, исто како и тогаш, денес се води агресивна војна против суверена земја, во име на идеали што се разбирливи само за агресорот.
-Човештвото има тенденција да не учи од грешките. Сè уште ги гледаме некои од елементите што доведоа до Втората светска војна во светот денес. Како што тогаш се создаваше историја што ни е јасна денес, денес се пишува историја што можеби им е јасна на нашите деца и внуци, но можеби не ни е јасна нам, рече претседателот откако положи венец на Националниот споменик во Прага.
Тој рече дека, исто како и пред 80 години, „идеалите“ во чие име се води војната против суверена Украина се разбирливи само за агресорот.
Петр Павел нагласи дека денес им оддава почит на сите војници, без разлика од која земја доаѓаат, без разлика на кое бојно поле се бореле.
Поголемиот дел од Чехословачка беше ослободен од Црвената армија во 1945 година, додека американските трупи, поддржани од белгиските и други единици, ги ослободија западните делови на Чешка.
Павел, сепак, потсети дека тоа не било целосно ослободување за Чесите и Словаците, туку дека источноевропските земји неволно станале сателити на Советскиот Сојуз.
-Тоа не беше целосно ослободување за нас. Во текот на долгите децении, бевме изложени на притисоци од различен вид, рече Павел.
фото: МИА архива
