Најистакнатите македонски Бугари, кои добиваат најмногу закани, немаат бугарско државјанство, но поднеле документи пред многу години, вели секретарот на затворениот бугарски културен клуб Цар Борис Трети во Охрид, Христијан Пендиков во интервју за БНТ.
Тој вчера на државна церемонија во Софија доби бугарско државјанство.
Пендиков вели дека добивал закани, а сега уште повеќе откако и официјално станал Бугарин со бугарско државјанство и апелира „дека на македонските Бугари им е потребна помош“.
– Сакаме да имаме еднакви права како и другите кои живеат во С. Македонија. Бугарите се малтретирани прво преку државните институции, како што е полицијата. Нивните фотографии потоа беа споделени во разни онлајн групи, нарекувајќи ги предавници и повикувајќи на насилство. Не третираа како црн ѓавол во Македонија, вели Пендиков.
Тој додаде дека Бугарија е како што очекувале.
– Соседна земја која секогаш ни помагала. Не знам зошто, ако ја кажеме вистината, некои луѓе се навредени од ова, вели Пендиков.
Тој додаде дека бугарското државјанство му дава мир за претстојниот случај и дека ќе се чувствува мирен како Бугарин до крајот на животот.
Пендиков, во јануари годинава беше истепан во Охрид, а веднаш потоа со бугарски владин авион беше пренесен на лекување во Софија, каде набргу потоа го посети и македонскиот министер за надворешни работи Бујар Османи, кој го прекинал скијањето за да отиде во посета на Пендиков.
