Денеска продолжуваат разговорите меѓу Владата и синдикатите за повисоки плати во јавниот сектор, а од процентот (14 отсто) што се бара денеска се зачуди и министерката за труд и социјална политика, Јованка Тренчевска, откако вчера вчудовиден беше и вицепремиерот Фатмир Битиќи.
Од Сојузот на синдикати на Македонија, по одржувањето на Еконосмко-социјалниот совет, вчера рекоа дека нивниот предлог е инфлацијата која лани беше 14,5 проценти да биде основниот параметар со кој ќе се зголемат платите во јавниот сектор и сите да добијат исплата на регрес за годишен одмор.
Но, претставници на владата, кои се дел од Економско-социјалниот совет, и тоа најмногу тие што добија 78 отсто покачување на платата по одлуката на Уставен суд, се зачудени од каде излегол предлогот на синдикатите за зголемување на платата во јавниот сектро да биде 14 отсто?
Според Тренчевска во преговорите за зголемување на платите во јавниот сектор досега не се разговарало за 14 отсто, како што рекоа вчера синдикалните претставници по седницата на Економско-социјалниот совет.
– Јас не знам од каде 14 отсто кога досега не се разговараше за 14 отсто. Се разговара за систем за плати којшто ќе одговара на сите, да не заборавиме дека платите на дел од државните службеници беа зголемени во март за 2.175 денари, тоа зависно, кај некои е 7 или 8 отсто, а кај други е дури и 16 проценти. Сега во моментов се разговара во рамки на Економско – социјалниот совет да се најде системско решение. Се работи да најдеме систем кој ќе биде во ред и за синдикатите и за работодавачите, односно и за Владата и за сите, рече денеска Тренчевска одговарајќи на новинарско прашање, по потпишувањето на Програмата за достоинствена работа.
Претседателот на ССМ, Слободан Трендафилов, кој присуствуваше на настанот, повтори дека „инфлацијата која минатата година според официјалните податоци е 14,2 проценти, треба да биде основниот параметар по кој ќе се пресметуваат платите на вработените во јавниот сектор.
Министерот за финансии Фатмир Бесими смета дека барањата на синдикатите се легитимни зашто, како што рече, тие се борат за одржување на животниот стандард пред инфлацијата. На секоја средба, според Бесими, има атмосфера и волја да се дојде до решение, но тоа, напомена, мора да биде здраво, системско и одржливо.
-Морам во оваа фаза да кажам дека иако во разни моменти имаме различни ставови или погледи за одредени прашања, има атмосфера и волја од сите страни да дојдеме до решение. Презентираме различни позиции, но битно е во период на инфлација, кога се бориме да ја сузбиеме од сите аспекти, и динамиката на раст на платите да може да помогне во тој процес зашто тоа што ќе биде резултат е – колку реално ќе расте платата. Инаку, и административците се граѓани кои бараат јавни услуги. Ни треба ефикасна, професионална админстрација која ќе биде поддршка на стопанството, покрај другите развојни фактори, за тоа да се раздвижи и да расте побрзо. Тоа се врзани садови и во тој дел, ако поставиме здрав систем, здраво системско решение, ќе направиме основа за во иднина, децениски, да имаме етаблиран систем кој ќе донесе и поквалитетен јавен сектор, истакна вчера министерот Бесими во интервју за ТВ Сител.
Според Бесими, Македонија ќе биде прва држава во светот што ќе ги индексира платите во јавниот сектор со просечната бруто плата.
-Има неколку работи испреплетени со кризата, посебно кога зборуваме за инфлацијата – таа е феномен кој носи многу предизвици, а друг момент е и спиралата. Тука барањата на синдикатите се легитимни, зашто тие се борат за одржување на животниот стандрад пред инфлацијата. И ние за тоа се залагаме, но разговараме со нив за чекор понатаму. Разговорите се во тек, не можеме сите аспекти во детали да ги објавиме, зашто не се целосно усогласени, но генерално, начелно сме согласни и ќе бидеме прва држава во светот што ќе ги индексира платите во јавниот сектор со просечната бруто плата. Има примери со инфлација и со минимална плата, а со просечна бруто плата што е во интерес на вработените можеби ќе бидеме први што користиме ваков модел. Еден предлог е дека март 2025 целосно ќе биде, но очекуваме процесот да се заокружи, изјави Бесими.
