ПО ВЕТОТО ВО ЕУ: Бучковски денеска оди во Софија да го сече „Гордиевиот јазол“ со Борисов, Захариева, Каракачанов и Радев

Специјалниот пратеник на Владата за решавање на недоразбирањата со Софија, Владо Бучковски, денеска ја започнува својата прва официјална посета на Бугарија.

Од бугарското МНР соопштија дека вицепремиерот и министер за надворешни работи Екатерина Захариева денеска ќе го прими специјалниот претставник на РС Македонија за Бугарија Владимир Бучковски.

По разговорите, Захариева и Бучковски ќе одржат прес-конференција во Министерството за надворешни работи.

Бучковски, како што јавија бугарските медиуми, за време на посетата на Софија, ќе има средби и со премиерот Бојко Борисов и министерот за одбрана Красимир Каракачанов, а в четврток ќе се сретне и со претседателот Румен Радев.

Универзитетскиот професор, поранешен премиер и поранешен претседател на СДСМ, Бучковски Владата минатата недела го назначи за специјален пратеник во Бугарија.