Одбојкарската репрезентација на Полска е третиот полуфиналист откако во фантастичен меч ја совлада селекцијата на Србија.
Во меч во кој беше одигран и маратонски сет, Полска славеше со 3-1 во сетови и тоа со 26:28,25:15,36:34,25:17 и си закажа полуфинална пресметка со Словенија која вчера во четири сета ја победи Украина.
Првиот сет и припадна на Србија и тоа со 28:26 откако претходно Полјаците не успеаја да реализираат двете сет топки. Србите со серија од 3:0 од 25:26, дојдоа со 28:26 и водство од 1-0 во сетови.
Полјаците во вториот сет покажаа зошто се прва репрезентација на ранг-листата на Светската одбојкарска федерација и славеа со убедливи 25:15.
Во третиот сет се одиграа дури 70 поени, а на крајот се радуваа Полјаците. Ниту една репрезентација немаше повеќе од два поени предност, Србија имаше три сет топки, додека Полска ја искористи дури осмата сет топка за 36:34 и водство од 2-1 во сетови.
Во четвртиот сет, Полјаците откако дојдоа до три поени предност (12:9), не го испуштија водството и на крајот славеа со 25:17 и се пласираа во полуфиналето.
