Годинава за првпат ќе го прославуваме 11 Октомври, во малку апсурден историски момент: Утре ќе ги слават слават борците против фашизмот во Македонија и Народноослободителната борба, тие што се на власт и во слобода не се изборија и не спречија имиња на соработници на фашизмот на бугарски клубови во Македонија.

Годинашнава прослава на 11 Октомври се случува само неколку денови по отворањето на клубот Цар Борис Трети во Охрид, што го носи името на личност соработник на фашизмот, и само неколку месеци по отворањето на клуб во Битола, што исто така носи име на контроверзната личност Ванчо Михајлов.

По повод одбележувањето на државниот празник 11. Октомври – Ден на народното востание, Владата Македонија утре пред Спомен – костурницата во Куманово организира централен свечен настан за одбележување на државниот празник под мотото „Секогаш на вистинската страна“.

Дополнително владини делегации ќе положат свежо цвеќе пред спомениците на паднатите борци од НОБ во Скопје и Прилеп.

Како што соопшти владината прес-служба, централниот настан во Куманово започнува со положување  цвеќе на Спомен – костурницата. Владината делегација ќе ја предводи премиерот Димитар Ковачевски, а е составена од Артан Груби, прв заменик на претседателот на Владата и министер за политички систем и односи меѓу заедниците, Јована Тренчевска, министерка за труд и социјална политика, Адмирим Алити, министер за информатичко општество и администрација.

Потоа, настанот продолжува со културно – уметничка програма на платото пред Спомен – костурницата и со обраќање на претседателот на Владата, Димитар Ковачевски.

Со посебни почести владина делегација предводена од вицепремиерката за политики за добро владеење, Славица Грковска, а во состав на Александар Бајдевски, заменик-министер за информатичко општество и администрација и Башким Хасани, заменик-министер за одбрана ќе положат свежо цвеќе на споменикот на „Ослободителите на Скопје”, на платото кај Владата на Македонија.

Како дел од чествувањето на празникот 11-ти Октомври, официјална владина делегација ќе учествува на настан во Општина Прилеп пред споменикот „Методија Андонов – Ченто“. Во состав на оваа владина делегација се Бисера Костадиновска-Стојчевска, министерка за култура, Владимир Рендевски, заменик-министер за здравство, Џемил Ќамили, директор на Агенцијата за развој на земјоделство.

Вечер во Прилеп ќе има традиционално импровизиран напад на Участокот во спомен на македонските борци против бугарскиот фашистички окупатор на Македонија. А во последниве денови и последниве години имаме реален напад на историјата на македонскиот народ и импровизирана одбрана од тие што ја водат Македонија на патот кон иднината која беспоштедно и со полни усти ја ветуваат.

(Д. Г.)