Со новиот закон, државата испраќа јасна порака дека јавното здравје, особено здравјето на младите и непушачите, е приоритет, во изјава за МИА потенцираше пулмо-алергологот, примариус доктор специјалист Оливер Зафировски, директор на Јавната здравствена установа Универзитетска клиника за пулмологија и алергологија во Скопје.
Со доктор Зафировски разговаравме околу новиот закон против пушење.
– Според спроведените анализи и релевантни податоци за состојбата со употребата на тутунски производи во земјава, се проценува дека околу половина од популацијата во Северна Македонија е зависна од цигари, со просечна дневна консумација од 18 до 22 цигари по лице, истакна докторот.
Тој сподели дека особено загрижувачки се податоците кај младата популација.
– Анализите укажуваат дека околу 7,7 отсто од децата на возраст од 13 до 14 години се активни пушачи, додека кај младите од 15 до 16 години, тој процент достигнува приближно 37 проценти. Дополнително, употребата на електронски цигари се идентификува како масовна и сè пораспространета појава меѓу младите, што претставува сериозен ризик за јавното здравје и дополнителен предизвик за превентивните политики, предупреди Зафировски.
Доктор Зафировски додаде дека кај лицата со ХОББ, астма и други хронични болести, никотинот и тутунот директно ја влошуваат здравствената состојба.
– Тие го зголемуваат ризикот од тешки компликации и се силно поврзани со развој на малигни заболувања, нагласи Зафировски.
Притоа, појасни дека електронските цигари често се перципираат како побезбедна алтернатива на класичните цигари.
– Но, научните докази покажуваат дека тие не се безопасни. Иако не создаваат чад како тутунот, тие создаваат аеросол што содржи никотин, тешки метали и други хемиски супстанци што имаат негативно влијание врз здравјето, алармираше директорот на Клиниката за пулмологија и алергологија.
Осврнувајќи се на влијанието врз здравјето, тој нагласи дека никотинот е високо зависна супстанца.
– Кај младите луѓе, неговата употреба може да влијае врз развојот на мозокот, концентрацијата и менталното здравје. Дополнително, постојат докази за зголемен ризик од респираторни и кардиоваскуларни проблеми кај корисниците на електронски цигари, сподели докторот.
Посебен ризик за младите, како што рече докторот, се електронските цигари.
– Електронските цигари со вкусови се особено привлечни за децата и адолесцентите. Тие создаваат лажна слика дека станува збор за безопасен производ, а всушност често претставуваат прв чекор кон никотинска зависност и подоцнежно користење класични цигари, подвлече Зафировски.
Говорејќи околу тоа зошто е важен новиот закон, пулмо-алергологот истакна дека вклучувањето на електронските цигари во регулативата е чекор усогласен со европските препораки и со современите научни сознанија.
Како стручно лице, тој потсети колку е голема важноста на заштитата на јавното здравје.
– Забраната за употреба на електронски цигари во затворени јавни простории не е насочена против поединците, туку е мерка за заштита на сите граѓани од пасивна изложеност и нормализација на пушењето, заклучи докторот.
Зафировски потсети дека во рамките на Клиниката за пулмологија и алергологија во Скопје функционира организиран пристап за одвикнување од пушење.
– Имаме стручен психолог кој активно работи со пациенти преку индивидуални советувања и психолошка поддршка за надминување на никотинската зависност. Покрај тоа, развиен е и посебен проект и структурирана програма за одвикнување од пушење, што вклучува психолошка поддршка, едукација и континуирано следење на пациентите, додаде директорот на Клиниката.
Во изјавата за МИА, тој со порака до населението.
– Важно е да разбереме дека електронските цигари не се безбеден производ. Регулацијата не е казна, туку превенција. Нашата цел е информирано општество, поздрави млади генерации и намалување на зависностите што имаат долгорочни последици по здравјето, дециден беше пулмо-алергологот Зафировски.
МИА
