Експлозиите и оштетувањата на гасоводите Северен тек во Балтичко Море го олеснија патот за американскиот течен гас во Европа, изјави денеска рускиот претседател Владимир Путин.

Тој реле дека „одговорни се тие што имаат најголема корист од штетата предизвикана на гасоводите.

– Сите сфаќаат кој стои зад ова и кој е корисникот. Сега ЛНГ, течниот природен гас, од САД може да се внесе во европските земји во многу поголеми коилчини, рече Путин во говорот на форумот Руската недела на енергија во Москва.

Тој додаде дека Европа е виновна за нејзината енергетска криза со политиките што ги намалија инвестициите во индустријата за нафта и гас и дека ограничувањата на цените ќе ја влошат ситуацијата, пренесува Ројтерс.

Изјавата на Путин доаѓа во време кога земјите од ЕУ се обидуваат да договорат начин за спречување на зголемените трошоци за енергија. Загриженоста за безбедноста на снабдувањето со енергија денеска беше зголемена поради истекувањето на гасоводот Дружба во Полска, што доведе до намалување на протокот на нафта од Русија во Германија.

Полските власти велат дека истекувањето најверојатно било предизвикано од несреќа, но тоа доаѓа додека земјите од Европската унија се обидуваат да се адаптираат од зависноста од руската енергија како одговор на инвазијата на Украина.

Гасната врска Северен тек кон Германија сега е надвор од функција по минатомесечното истекување, за што и Русија и Западот обвинија за саботажа, но не идентификуваа кој стои зад тоа.

Путин рече дека истекувањето на двата гасоводи Северен тек што минуваат под Балтичкото Море се „чин на меѓународен тероризам“ што ги лишува луѓето од евтина енергија. Тој рече дека сè уште може да се испорачува гас преку единствениот недопрен дел од гасоводот Северен тек 2, но зависи од ЕУ дали таа сака да го стори тоа или не.

Германија го замрзна проектот Северен тек 2 неколку дена пред Русија да испрати војници во Украина, а портпаролот на германската влада денеска ја отфрли можноста да го преземе гасот преку таа рута.

Путин, исто така, ја даде идејата за создавање алтернативен европски центар за гас преку Турција.

– Ние би можеле да ги преместиме изгубените количества по северните текови по дното на Балтичкото Море до регионот на Црното Море и на тој начин да ги создадеме главните патишта за снабдување со нашето гориво, нашиот природен гас во Европа преку Турција, рече Путин на форумот, објави Ројтерс.

– Тоа е, се разбира, доколку нашите партнери се заинтересирани за ова. Прашањето е, се разбира, економската изводливост, рече тој.

Путин рече дека Москва не е виновна за високите цени на енергијата во Европа и тврди дека активностите на зелената енергија на ЕУ доведоа до недоволно инвестирање во глобалната индустрија за нафта и гас.

Земјите од Групата седум (Г7) разговараат за ограничување на цената на руската нафта, а Путин верува дека тоа може да ги продлабочи проблемите.

Влијанието на напорите да се користи помалку руска енергија и ненадејните кратења на снабдувањето од Русија, се почувствуваа во сите 27 земји на ЕУ, а цените на бензинот се речиси 90 отсто повисоки од пред една година, а постои страв од рационализација и прекини на струја за време на претстојната зима.