Во Собранието на Македонија денеска ќе заседава собраниската Комисија за финансирање и буџет која ќе расправа за ребалансот на Буџетот за 2021 година, во второ читање.
Вкупните приходи се планирани на ниво од 222,6 милијарди денари и се за околу 10 милијарди денари или 4,7 проценти повисоки во однос на иницијалните проекции, додека вкупните расходи се на ниво од 268,8 милијарди денари или се повисоки за околу 21 милијарди денари. Капиталните расходи се планирани на ниво од 30,5 милијарди денари или за 6,5 милијарди денари повисоки во однос на планот за 2021 година.
Дефицитот е проектиран во износ од 46,2 милијарди денари, односно 6,5 проценти од БДП, а стапката на инфлација е предвидено да изнесува 2,1 процент.
Според надлежните, ребалансот значи стабилизирање на економијата, а во него клучни сегменти се зголемувањето на капиталните инвестиции и продолжувањето на поддршката за стопанството. За опозицијата, пак, ребалансот е предизборен поткуп.
Расправата за ребалансот почна на 1 јули.
