Русија одговори со потсмев на наводниот коментар на германскиот канцелар Фридрих Мерц, кој изрази недоверба кон другите европски лидери во врска со способноста на американските емисари да преговараат за мир во Украина, објави ДПА.
„Драг Мерц, ти воопшто не си во играта. Се дискредитираш себеси со поттикнување војна, саботирање на мирот, со нереални предлози, со самоубиство на западната цивилизација, со миграција и со тврдоглава глупост“, напиша Кирил Дмитриев, специјален пратеник на рускиот претседател Владимир Путин, на социјалната мрежа Икс.
Дмитриев реагираше откако германското списание „Шпигел“ објави дел од разговор меѓу високи европски политичари, во кој учествувал и украинскиот претседател Володимир Зеленски.
„Тие играат игри со тебе и со нас“, му рекол Мерц на Зеленски, осврнувајќи се на американските пратеници, според „Шпигел“.
Портпаролот на германската Влада изјави дека во принцип, информациите за доверливите разговори не можат да бидат објавени.
„Ве молиме разберете, ние не коментираме поединечни медиумски извештаи“, рече портпаролот, осврнувајќи се на изјавите дадени од Мерц на прес-конференцијата во понеделникот со полскиот премиер Доналд Туск. На настанот, Мерц рече дека имал заеднички разговор со Зеленски, францускиот претседател Емануел Макрон, британскиот премиер Кир Стармер и други европски партнери. Мерц нагласи дека тие прават сè што е можно за да ја одржат трансатлантската заедница обединета.
Кремљ ги обвинува западните сили за војната што Владимир Путин ја започна против Украина во 2022 година. Путин постојано тврди дека Западот ја користи Украина како алатка за водење војна против Русија, пренесува ДПА.
Кирил Дмитриев, кој е претставник на Русија во мировните преговори, се смета за вешт дипломат кој користел економски стимулации за да добие поддршка од администрацијата на Трамп.
фото: Архива
