Се чини дека Берлин сè повеќе не е во чекор со своите сојузници кога станува збор за вооружувањето на Украина, објави во четвртокот германскиот весник Die Welt, додавајќи дека ова прашање влијае на односите меѓу сојузниците во НАТО. САД, наводно, сакаат Германија да заземе понаметлив пристап кон воената помош за Киев, се вели во извештајот.
Минатата недела, американската амбасадорка во Берлин, Ејми Гутман, изјави за германската телевизија ZDF дека очекува Германија „да преземе поголема лидерска улога“. Таа ја призна воената помош на Берлин за Киев, но рече дека нејзините очекувања се „уште поголеми“.
„Досега Германија го направи она што го баравме“, изјави американски официјален претставник за Die Welt во четвртокот, додавајќи дека Берлин може да се движи „побрзо“. Весникот објави дека Вашингтон „се сомнева“ во фундаменталната лојалност на Германија кон Киев, прашувајќи дали сака Украина да „победи“ или само „да не загуби“.
Во вторникот, германскиот таблоид Билд тврдеше дека американските официјални лица, наводно, испратиле дипломатска нота до Берлин, во која државниот секретар Антони Блинкен, наводно, рекол дека Вашингтон ќе ја „поздрави“ одлуката на Германија да испрати борбени тенкови во Украина, без директно да побара таков чекор. Портпаролката на американската амбасада во Берлин, сепак, го негираше ова тврдење истакнувајќи дека таков контакт не е остварен.
„Не е точно дека и кажавме на Германија дека мора да испорача тенкови“, изјави американски функционер, исто така, за Die Welt во четвртокот, додавајќи дека САД претпочитаат Германија да преземе поголема лидерска улога, што сега „значи да и помогне на Украина“.
