Легалното производство на канабис во Колорадо емитува повеќе штетни гасови од државната индустрија на рудниците за јаглен, покажува најновото истражување.
Производството и употребата на канабис од медицински или рекреативни причини моментно е легално во неколку американски сојузни држави, што доведе до значителен напредок на индустријата.
Биоекологистката Хејли Самерс и нејзините колеги од Универзитетот во Колорадо ги анализирале нивоата на емисиите на штетни гасови кои доаѓаат од фармите со канабис. Тие откриле дека емисиите варираат од држава до држава, но приближно еден килограм произведен сув цвет емитува од 2,3 до 5,2 тони еквивалент на јаглерод диоксид (CO2e).
Во Колорадо емисиите од фармите со канабис изнесуваат околу 2,6 мегатони CO2e, што е повеќе од оние во рудниците за јаглен со 1,8 мегатони CO2e, пишува Њу сајентист.
– Емисиите кои се создаваат од производството на 28 грама сушено цвеќе се еднакви на оние по согорувањето на 26 до 50 литри бензин, истакна Самерс.
Поголемиот дел американски канабис се одгледува во затворени простории од две причини. Првата е дека некои земји не дозволуваат одгледување на отворено, а втората е дека производителите се плашат од кражба на растенијата. Ова значи дека најголемиот дел од емисиите при производството на канабис всушност доаѓаат од системот за осветлување и контрола на климата.
Експертите затоа советуваат да се премине на одгледување на отворено, бидејќи тоа би ги намалило енергетските потреби и штетните емисии.
