Лицемерното ВМРО-ДПМНЕ во чиешто владеење беше забележана рекордна висока цена на горивата, денес во отсуство на идеи, продолжува да глуми загриженост и да шири лажни вести и измислици, соопшти СДСМ.
– Граѓаните паметат дека токму за време на владеењето на ВМРО-ДПМНЕ и режимот на Никола Груевски граѓаните плаќаа најскапо гориво од осамостојувањето на државата. 2012 година ќе остане запаметена како година кога горивата достигнаа највисока цена. Година кога граѓаните за литар Еуросупер 95 плаќаа 89 денари, за Еуросупер 98- 90,5 денари, а дизелот чинеше 73,5 денари. Наместо да ја лаже јавноста, ВМРО-ДПМНЕ треба да знае дека цената на нафтата не ја одредуваат ниту СДСМ ниту Владата, туку дека таа се одредува од страна на Регулаторната комисија за енергетика според строго утврдена формула. Со ваквото однесување ВМРО-ДПМНЕ само потврдува дека се уште функционира на основа на лаги и измислени сценарија и глуми лажна загриженост кон граѓаните без притоа да даде вистински реални идеи за подобар и поквалитетен живот, соопштува СДСМ.
Во соопштението се наведува колкава била цената на бензините во Македонија во 2012 година, а не се наведува колкава беше цената на суровата нафта на светските берзи тогаш и денес. Како и колкава беше цената на горивата кога дојде СДСМ на власт и колкава е денес. И дека, за волја на вистината, акцизата на нафтата драстично се зголеми откако СДСМ „го урна режимот на Груевски“.
