Грижата и поддршката за работниците и унапредувањето на работничките права се приоритет на СДСМ и на институциите што ги предводи, соопштија денеска од владејачката партија.
Нивното соопштение го пренесуваме во целост:
Со процесот на измени на Законот за работни односи, со кои недела станува неработен ден, ден за одмор за најголем дел од работниците, СДСМ реализира уште едно ветување од Програмата и овозможува поголема социјална еднаквост и заштита и унапредување на работничките права.
Со навремената и ефикасна помош, преку четири пакети мерки, во време на кризата предизвикана со корорнавирусот, Владата предводена од СДСМ спаси стотици илјади работни места во десетици илјади компании.
Ја зголемивме минималната плата од 9 на 14.500 денари, а просечната плата изминатите години континуирано расте, во ноември лани се зголемила за седум отсто во однос на просечната плата во истиот месец претходната година, односно за 1800 денари.
Поддршката за стопанството, за работниците и граѓаните продолжува и со петтиот пакет мерки, кој е во финална фаза.
СДСМ останува посветена на креирање и реализација на мерки и политики што го враќаат достоинството на работниците и обезбедуваат повисок животен стандард за сите граѓани.
Центар за односи со јавноста на СДСМ
