Македонија го доби своето место во НАТО, обезбедена е светла и сигурна иднина за граѓаните и државата, соопшти денеска СДСМ.
– Земјите членки на НАТО го потпишаа Протоколот за пристапување на Македонија во Алијансата, Македонија доби свое место во најмоќниот безбедносен сојуз во светот. Од земја во долгогодишна изолација и неизвесност, Македонија денес е на иста маса, рамо до рамо со државите од демократскиот свет. Потпишувањето на Протоколот е потврда за успешната меѓународна политика, признание за вложениот труд во реформите, визионерството во решавањето на отворените прашања со соседите и градењето пријателски однос со демократскиот свет, се вели во соопштението.
Интеграцијата во НАТО, се додава натаму, значи гарантирана безбедност и стабилност, сигурност на нашите граници но и огромни економски придобивки за граѓаните, пораст на инвестициите, повеќе пари, зголемен економски раст.
– Обезбедена е светла и сигурна иднина за граѓаните и државата. Успехот на Македонија е успех на сите граѓани и најголем пораз за сите деструкции, на сите обиди да се спречи напредокот на земјава кон НАТО, да се блокираат процесите кои не водат напред, се вели во соопштението од Центар за комуникации со јавноста СДСМ.
