Владејачкиот СДСМ вчера објави дека владата која ја предводат обезбедила пари во криза за рекордно заголемување на пензиите, платите и други намени, а денеска потсетува вторпат за овој „историски успех“. И денешното соопштение го објавуваме од збор до збор како што е лиферувано од Бихаќска:
Со ребалансот на Буџетот за 2022 година обезбедени се средства за повисоки плати и пензии, за поголема поддршка на земјоделците, но и за антикризни мерки за помош на граѓаните и компаниите.
Во услови на глобална економска и енергетска криза, обезбедени се дополнителни 76 милиони евра за антикризни мерки за помош на граѓаните во справувањето со последиците.
52 милиони евра издвојуваме за поддршка на земјоделците за да поттикнеме зголемување на домашното земјоделско производство.
Преку одговорен пристап, обезбедени се и доволно средства за рекорден раст на пензиите, за зголемување на платите во образованието и детската заштита но и за субвенционирање повисоки плати во приватниот сектор.
Ребалансот е уште еден чекор кон обезбедување на макроекономската стабилност и конкретна поддршка за стопанството.
Продолжуваме со реализација на мерки и политики кои имаат за цел заштита на животниот стандард на граѓаните и полесно справување со последиците од глобалната економска и енергетска криза.
Центар за односи со јавноста на СДСМ
