Поради опасност од ширење на пожарот во неготинско, упатен е апел, жители од неколку села да ги напуштат живеалиштата. Вакво соопштение штотуку издаде Штабот за заштита и спасување на Општина Неготино, објави порталот Курир.
– Се упатува апел до населението во општина Неготино и тоа во селата Пештерница, Бела Вода, Калањево, Липа, Брусник и околните места, да ги напуштат своите живеалишта/престојувалишта и да се засолнат на безбедно место во градот или околните села што не се зафатени од пожарот, поради опасноста од забрзано ширење на истиот, се вели во соопштението.
Претходно утрово беше објавено дека нема опасност од ширење на пожарот:
Генерално, нема опасност за населби и инфраструктура од големиот пожар кај армискиот полигон „Пепелиште“, со опсег од десетина километри, гаснењето продолжува, информираа утринава од Центарот за управување со кризи (ЦУК).
– Нема опасност и загрозување на населби, објекти и инфраструктура, според информации од терен, но и денеска од утрово се дејствува врз пожарот, а ЦУК упати и барање за поддршка за целосно извидување на теренот од воздух до МВР, а и барање за извидување од воздух со дронови на Граничната полиција и на „Фронтекс“, појаснија од Центарот.
Во раните утрински часови, се дејствувало врз пожарот во реон на армискиот воен полигон „Пепелиште“ од страна на ТППЕ – Неготино и јавните комунални претпријатија од општината, а и со локална поддршка од месното население.
– Опасниот крак од пожарот што ги загрозуваше селата Пепелиште и Војшанци, вчера е изгаснат, така што, не постои повеќе опасност од пожарот за двете села, истакнаа од ЦУК.
При утринската координација на ТППЕ од Неготино, ЦУК и МВР, било одлучено хеликоптер на МВР, утрово, да дејствува на теренот каде што е пожарот во правец од село Војшанци, кон сртот на планината Серта, за да не префрли пожарот кон Конечка Планина. Таму има густа вегетација од ниска шума, нискостеблеста иглолисна вегетација и висока трева.
– Дел од екипите на пожарникарите од ТППЕ и јавните комунални претпријатија од Неготино се концентрирани на поголемите жаришта од пожарот на планината Серта. Тие екипи, заедно и со дел од мештаните, континуирано дејствуваат во тој предел за да го стават пожарот под целосна контрола. Целата операција на дејствување врз пожарот е задолжен да ја води командирот на ТППЕ и по негова проценка, дека има потреба од дополнителни ресурси за справување и гаснење на пожарот, преку градоначалникот на општина Неготино, ќе ги побара од соседните општини, соопштија од ЦУК.
Армискиот хеликоптер „ми-17“ е планирано да се вклучи денеска околу 12 часот во гаснење на пожарот.
– Утрово, ЦУК упати и барање за поддршка за целосно извидување на теренот од воздух до МВР, а и барање за извидување од воздух со дронови на Граничната полиција и на „Фронтекс“ (Европската агенција за гранична и крајбрежна стража, што обезбедува оперативна поддршка во управувањето со границите, како помош и во нашата држава), споделија од Центарот.
Фото: МИА
