Со сослушување на сведоци, денеска во Кривичниот суд треба да продолжи судењето за петкратното убиство кај Смилковско Езеро на 12 април 2012 година „Монструм“ на Специјалното јавно обвинителство.
Овој предмет беше преземен од СЈО, по објавувањето на „бомбите на Заев“ со образложение дека масакрот кај Смилковско Езеро ќе биде расфетлен со нови сознанија од прислушуваните разговори што СДСМ и Заев ги објавуваа пред неколку години.
Случајот го води судијата Огнен Ставрев и се наоѓа во доказна постапка.
За петкратното убиство кај Смилковско Езеро на 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски, на доживотен затвор беа осудени Алил Демири, Африм и Агим Исмаиловиќ, Езим и Хаки Азири и Сами Љута.
Врховниот суд во декември 2017 година ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири, и им определи мерки на претпазливост. По укинувањето на пресудите, случајот „Монструм“ го презеде СЈО и предметот беше вратен на повторно судење.а
