Без оглед кога и да се случи формирањето на новата влада во Бугарија, двете страни не треба да губат време и треба да преземат конкретни чекори за меѓусебно приближување со цел да се ослободи патот за почеток на пристапните преговори на Македонија со ЕУ што е можно побрзо. Охрабрен сум од фактот дека партиите со нагласена националистичка агенда не беа наградени од страна на бугарските гласачи, вели во интервју за МИА шефот на австриската дипломатија Александер Шаленберг.
-Јас бев длабоко разочаран од неможноста да се започнат пристапните преговори со С. Македонија. Билатералните и историските прашања треба да бидат одвоени од овој процес. Ќе видиме како и кога ќе може да се формира нова влада во Бугарија. Кога и да се случи, двете страни не треба да губат време и треба да преземат конкретни чекори за меѓусебно приближување со цел да се ослободи патот за почеток на пристапните преговори на С. Македонија со ЕУ што е можно побрзо, вели Шаленберг на прашањето колку се реални очекувањата да ги започнеме преговорите со ЕУ за време на португалското претседателство.
Според него, важно е да се најде решение на билатерално ниво помеѓу Бугарија и Македонија без да се воведуваат овие прашања во процесот на проширување, а дали е потребно посредништво од трета страна, тоа вели, двете земји самите треба да го просудат.
-Доколку дојдат до таков заклучок, Австрија е секогаш подготвена да ги понуди своите капацитети, посочува Шаленберг.
Во однос на нон-пејперот за прекројување на границите на Балканот, првиот човек на австриската дипломатија не гледа причина за поголем коментар околу него, поради се уште нејасното авторство на документот.
-Сепак, една работа треба да биде јасна, а Австрија има цврст став околу тоа: територијалниот интегритет на Босна и Херцеговина не е на располагање под никакви услови, порачува Шаленберг.
Шаленберг во интервјуто кое МИА целосно ќе го објави утре, говори и за улогата на Виена како координатор на помошта на ЕУ за Западен Балкан и најавената испорака на 651.000 дози од вакцината Бионтек/Фајзер од кои 119.600 за Македонија, за ставот на Виена околу воведувањето на дигитален зелен сертификат, т.н. ковид-пасош, за процесот на дистрибуција на вакцини во самата ЕУ, како и за тоа дали Унијата падна на тестот на сопствените принципи за солидарност.
