Членството во НАТО за државата е важно не само на безбедносен плат, туку и на економски план, за што пристигнале и политички и економски потврди, токму при одбележување на Неделата на НАТО оцени денеска министерката за одбрана, Радмила Шекеринска, при посетата во Куманово на организираниот отворен ден на Армијата со граѓаните.
-Неодамна успеваме како држава да го подобриме кредитниот рејтинг, што значи дека и државата и фирмите и граѓаните ќе можат да добиваат средства под поповолни услови, изјави Шеќеринска.
Порастот на извоз, на странските директни инвестиции и особено падот на невработеноста, додаде министерката, покажува дека кога државата презема вистински чекори на политички план, тоа носи и позитивни економски резултати.
-Она што ни треба е сега да продолжиме, да го го заокружиме процесот на ратификации на членството во НАТО, што сме убедени ќе се случи и оваа година, да ги почнеме преговорите со ЕУ и да покажаме дека оваа држава научи од сопствените грешки и дека буквално во следниот период ќе обезбеди и побезбедна држава и повеќе шанси за сите свои граѓани-изјави Шекеринска.
Министерката за одбрана најави дека денеска во Куманово ќе дискутираат за развојот на локалната економија и ги истакна официјалните податоци на ниво на државата.
-Над 620 милиони евра странски инвестиции влегоа во 2018, тоа е речиси четири пати повеќе отколку во 2017, тоа е двојно повеќе од најдобрата година по странски директни инвестиции, рече министерката.
Странските инвеститори, посочи министерката, препознале дека државата се стабилизира и со членството во НАТО, може да го гарантира нивниот имот и бизнис. Таа направи споредба со почетокот на мандатот, укажувајќи дека тогаш кварталниот пораст на економијата бил во минус околу еден процент, а последните податоци укажуваат пораст од 3,7 проценти на БДП во последниот квартал.
-Сето тоа се охрабрувачки резултати. Нашиот проблем број еден е невработеноста, таа е се уште висока 19,7 проценти, меѓутоа го стартувавме мандатот со 27 проценти невработеност. Сите економски показатели покажуваат позитивни тенденции, но тие позитивни тенденции зависат од тоа како носиме одлуки на политички план, како државата ги решава своите проблеми, затоа сметаме дека во овој период е многу важно да продолжиме да продуцираме добри вести од дома, заклучи министерката.
Греши Државниот завод или министерката?
Но, дали министерката Шеќеринска греши или пак не му верува на Државниот завод за статистика од каде што ги користи бројките не е јасно. Во секој случај, според Државниот завод за статистика, мандатот не го почнале со 27 проценти невработеност, туку со многу понизок.
Така според ДЗС, во 2016 година стапката на невработеност изнесувала 23,7 проценти, а во 2017 била 22,4 проценти од активното население во Република Македонија.
Министерката Шеќеринска, веруваме, не се збуни толку многу, па да мисли на времиња кога почнувале мандат и со повеќе од 37 отсто и поголем процент невработеност, каков што наследи претходната власт од владата на СДСМ?!
Треба да се додаде дека најголемиот број вработувања во мандатот за кој говори Шеќеринска се во јавната администрација, државни компании и, како што веќе е информирана јавноста, со многу револт кај граѓаните поради непотизам и партизација.
