Граѓаните кои не се задоволни од работата на администрацијата на Град Скопје од денеска можат да пријават до внатрешната контрола на е-маил адресата kontrola@skopje.gov.mk.
– Пријавете доколку вашиот предмет не се сработува брзо, на време и пријавете доколку чувствувате дека имате непринципиелни побарувања од градската администрација, изјави скопскиот градоначалник Петре Шилегов во петокот, кога го промовираше воведувањето внатрешна контрола во работата на градската администрација.
Во Град Скопје првпат се воведува внатрешна контрола со цел обезбедување поголема ефикасност во работата и подобри и навремени услуги за сите граѓаните.
Покрај спречувањето на можноста за одолговлекување на постапките во Градот, со оваа реформа ќе се воведе и можност за следење и на ефикасноста на секој вработен во градската администрација. Внатрешната контрола на овој начин ќе води досиеја за секој вработен.
