Градоначалникот на Скопје Петре Шилегов за време на мандатот вети многу проекти во Скопје кои останаа само ветување, како тунелот под Кале, зиплајнот и многу други. Сега, пак, пред локалните избори Шилегов повторно „засука ракави“ и на скопјани им дава нова доза проекти кои ќе ги гради по завршувањето на неговиот мандат.

Во текот на следната година ќе почне изградбата на булевар „Цветан Димов“ во Општина Чаир, најави денеска  Шилегов, кој истакна денеска започнува тендерот за негово проектирање. Ќе има, рече Шилегов, шест коловозни ленти, централно зеленило, како и пешачки и велосипедски патеки.

– Конечно еден од најгорливите проблеми во нашиот град ќе почнеме чекор по чекор да го надминуваме. Моите очекувања се 2 до 3 години од сега ќе зборуваме за сосема поинакво Скопје, за сосема поинаков Чаир. Ова неформално значи и изградба на втората траса на Бас Рапид Транзитот имајќи предвид дека тука имаме коридор по кој ќе се движи БРТ до железничката во Бутел, изјави Шилегов, кој додаде дека овој булевар ќе биде широк 29 метри.

Воедно, Шилегов наведе дека ова проширување подразбира и експропријација на определен број објекти и нивно остранување од причина што се наоѓат на самата траса на изведба. Изведбата на овој проект според анализите на Град Скопје се проценува дека ќе изнесува до 6,5 милиони евра.

– Свесен сум дека ќе уриваме неколку објекти, ќе го надоместиме тоа, но многу повеќе сум свесен дека тоа ќе биде трајното решени за овој дел од градот. Кога ќе ги ставите на кантар зијанот и бенефитот што го добиват граѓаните тогаш дефинитивно станува збор за еден поголем бенифит, рече Шилегов.

Градоначалникот на Чаир, Висар Ганиу, истакна дека ова проширување е потребно и за град Скопје, и за жителите на Чаир.

– Од голема важност е изградбата на овој булевар имајќи предвид дека општина Чаир е најгусто населено место во земјата. Оваа улица е единствена артерја што ги поврзува и другите општини Бутел и Шуто Оризари, изјави Ганиу.

Иинвестицијата, дополни, ќе придонесе за поврзување на останатиот дел од градот со булевар „Х.Т Карпош” и обиколницата.