Можноста за продолжено заклучување во Сиднеј, Австралија, се појави денеска, откако здравствените работници пријавија уште едно рекордно зголемување на бројот на нови случаи на Ковид-19 оваа година, предизвикано од многу заразниот делта сој.
Австралиската држава Нов Јужен Велс денеска соопшти дека потврдила 112 нови, локални случаи на Ковид-19, од кои речиси сите се наоѓаат во Сиднеј, и покрај фактот што најголемиот град во земјата влезе во третата недела на локдаун.
Премиерката на Нов Јужен Велс, Гледис Береџиклиан, истакна дека од бројот на случаи во наредните денови ќе зависи дали ќе биде продолжено заклучувањето во Сиднеј, кое треба да биде укинато в петок.
Вкупниот број на инфекции се приближува до 700, помалку од еден месец по откривањето на првата инфекција со делта сојот кон средината на јуни.
Во болница се наоѓаат 63 лица, од кои 18 се на одделот за интензивна нега, а една жена на 90-годишна возраст е првата жртва на Ковид-19 оваа година во таа држава.
