Никогаш не сме биле подалеку од ЕУ. Што сакам да кажам, на дневен ред е разрешување на министри и наместо премиерот да образложи зошто разрешување, тој збореше за перспективата на Македонија во ЕУ. Антиевропски е да се зборува “сите во Владата кои се за ЕУ’. Ако сите се во Владата јас прашувам кој е опозиција, јас велам народот. Во ЕУ се коалицира врз основа на идеологија, а не врз основа на бизнис интереси. Во Македонија е коалиција секој со секого, рече Гордана Силјановска Давкова, пратеник од ВМРО-ДПМНЕ на денешната седница во Собранието на која се расправа за разрешување на министри.
Силјановска праша што ги врзува партнерите во коалицијата?
„Бизнис интересите. Разрешување и именување на министри во последната година се прави само за да се поентира или поради некој скандал, во спротивно оваа не е пракса“, посочи таа.
Силјановска апелираше до премиерот Димитар Ковачевски: „Премиере, волшебници да ви се овие што ќе ги вклучите за една година не може да се адаптираат, а не да сменат нешто“.
Пратеничката се осврна и на Алијанса за Албанците .
„Што се однесува до колегите од Алијанса, морам да кажам дека се плашам дека можеби ќе се соочат со истото како оние од Алтернатива. Не е европејството што ги влече во Влада, мислам само дека биле прагматични, или ако не можеш да ги победиш придружи им се, но тоа не е можно во држава што може да се наречен ДУИ-стан. Тие зборуваа за опасноста од дуизација. Кажуваа дека и животите им се загрозени, а што прават сега“, заклучи Силјановска.
