Во Белорусија вчера почна судењето во отсуство на лидерката на опозицијата Светлана Тихановскаја, која живее во егзил.
Тихановскаја и уште четворица обвинети, кои исто така се во бегство, се обвинети за заговор за неуставно преземање на власта и формирање екстремистичка група.
Таа го опиша судењето како „фарса“. Таа на својот канал Телеграм напиша дека сè уште не е информирана за точните обвиненија против неа.
По почетокот на судењето, многу европски и светски лидери го осудија овој чин и го нарекоа „срамно судење“, „политички мотивирано“ и „пример за кршење на човековите права“.
На претседателските избори во 2020 година, Тихановскаја беше противкандидат на долгогодишниот лидер Александар Лукашенко, а многу набљудувачи ја сметаат за вистински победник на изборите.
Откако Лукашенко се прогласи за победник, во Белорусија се одржаа невидени протести кои тој брутално ги потисна.
Тихановскаја, која помогна во водењето на протестите, мораше да побегне во егзил во Литванија. Минатото лето таа основа влада во егзил.
