Владата на СДСМ протнувала незаконски права за градење, за скапи подароци, се истакнува во денешната реакција од ВМРО-ДПМНЕ.
– Драги Рашковски како генерален секретар на Владата на седница потурил незаконско барање за градење во Гостивар на фирма, иако таа немала позитивно мислење од Комисијата при Министерството за транспорт и врски. За ваквото незаконско дејание на Рашковски постои сомнеж дека истиот преку неговата сопруга добил луксузен спортски автомобил Доџ Вајпер, во вредност од над 50.000 евра, кој пак во неговиот анкетен лист бил пријавен со вредност од 5.000 евра, се вели во денешното соопштение од опозициската партија.
Автомобилот, се додава во реакцијата, сопругата на Рашковски го стекнала со купување од лице кое од фирмата за која Рашковски го потурнал незаконското барање го набавил за 5.000 евра, односно 10 пати помалку од реалната вредност.
– Постојат огромни сомнежи за корупција на Рашковски. Но и се поставува прашањето дали само тој е примател на потенцијален поткуп, или се вмешани и други лица од врвот на власта. Институциите наместо да молчат, да реагираат согласно закон, бара ВМРО-ДПМНЕ.
Рашковски беше близок соработник со бившиот премиер Зоран Заев. Тој, пак, кога почнаа да се одмотуваат криминални афери, по обичај како и за се друго, се колнеше дека е убеден оти Рашковски е чис и честито си ја врши работата.
