ТРАГИЧНА СООБРАЌАЈКА: МВР трага по возачот кој на пешачки премин во Велес усмрти девојче и тешко ја повреди нејзината мајка

Јавен обвинител од ОЈО Велес ноќеска изврши увид на местото на сообраќајна несреќа на улицата „Борис Трајковски“ во Велес.

Според првичните сознанија, до несреќата дошло кога патнички автомобил кој се движел со голема брзина, на пешачки премин удрил во две лица – мајка и ќерка кои се наоѓале на крајот од преминот за да се качат на тротоар. Единаесетгодишното девојче починало на местото на несреќата, додека мајката се здобила со тешка телесна повреда. Полицијата трага по возачот.

Како што се наведува во соопштението, од ударот, мајката паднала на земја и се здобила со тешка телесна повреда, додека девојчето на возраст од 11 години било исфрлено значително нанапред, во близина на следниот пешачки премин кај училиштето „Васил Главинов“ и од здобиените повреди починало.

Возачот кој што ја предизвикал сообраќајната несреќа воопшто не запрел, туку со голема брзина го напуштил местото на настанот.

Дежурниот јавен обвинител и полициски службеници од СВР Велес извршија увид на местото, подигнаа траги и разговараа со очевидци на настанот, а веднаш е издадена и наредба за обдукција на телото на починатото девојче. По добиени сознанија за возилото и возачот – причинител на сообраќајната несреќа, СВР Велес по насоки на јавниот обвинител презема мерки за негово пронаоѓање, се наведува во соопштението од Јавното обвинителство.

Пронајден Мерцедесот, полицијата трага по велешанец кој го усмрти девојчето

Велешата полиција го пронајде возилото „Мерцедес“ со велешки регистерски таблички, а се уште трага по 29-годишниот А.Н. кој е осомничен дека доцна синоќа околу 22:15 часот на пешачки премин на ул „.Борис Трајковски“ во близина на ООУ „Васил Главинов“ во Велес усмрти 11 – годишно девојче и ја повреди нејзината 43 – годишна мајка Е.И.

Ристе Самарџиев, портпарол на СВР Велес појаснува дека во несреќата малолетничката починала на местото на настанот, а смрт констатирал лекар од Итна медицинска помош, додека со телесни повреди се здобила 43- годишната Е.И, констатирани во болницата во Велес.

Увид на местото на настанот извршил Јавен обвинител и екипа на СВР Велес.

-По превземените мерки возилото беше најдено и се превземаат мерки за расчистување на случајот, појаснува Самарџиев.

Како што информира за МИА д-р Елена Левкова Ќулумова, портпарол на ЈЗУ Општа болница Велес мајката имала отворена рана на глава и повреда на потколеница. Поврдеите биле санирани, а утрово била исратена на домашно лекување.