По апсењето на Роџер Стоун, поранешен советник на Доналд Трамп, американскиот претседател се огласи на Твитер:
“Најголем лов на вештици во историјата на нашата земја! Нема тајна соработка (со Русија)! Шверцери на мигранти, дилери на дрога и трговци со луѓе се третираат подобро. Кој им поткажа на CNN да бидат таму (на местото на апсење пред домот на Роџер)?”
Претходно, портпаролката на Белата куќа, Сара Сандерс, изјави дека апсењето на поранешниот политички советник на американскиот претседател Доналд Трамп, Роџер Стоун, во истрагата на специјалниот обвинител Роберт Малер, нема никаква врска со првиот човек на САД.
Изјавата на Сандерс следеше неколку часа по апсењето на Стоун, рано утрово во неговиот дом на Флорида од страна на Федералното истражно биро (ФБИ), поради седум обвиненија, меѓу кои и за закани кон сведок и лажни изјави.
Сандерс, во изјава за Си-Ен-Ен не одговори директно на прашањето на кој официјален претставник од предизборниот штаб му е наредено да му даде информации на Стоун за објавите на Викиликс.
Приведувањето на Стоун е по барање на тимот на специјалниот обвинител Роберт Малер, кој води истрага за наводното руско мешање во претседателските избори во САД во 2016 година и за карактерот на врските меѓу изборниот штаб на Трамп и Москва.
Стоун ќе биде изведен денеска пред суд.
