Сојузот на синдикати на Македонија ја почна јавната седница на највисоките тела пред Собранието каде упати порака до пратениците да донесат одлука за зголемување на минималната плата на 500 евра. Пред Собранието беше донесена одлука пратениците да земаат минимална плата се до наредното зголемување на минималната плата.
– Вашите сега 79 отсто зголемени плати не ги заслужувате и затоа дојдовме тука поради фактот што вие не одлучувате за нас, ние ќе одлучиме за вас. Почитувани работници, да донесеме одлука пратениците да бидат на минимална плата до наредното зголемување на минималната плата, рече претседателот на ССМ, Слободан Трендафилов.
Седницата продолжува пред Стопанската комора на Македонија, а треба да заврши пред Владата.
На почетокот пред Работничкиот дом во Скопје, работниците со едноминутно молчење им одадоа почит на трагично загинатите во трагедијата во Кочани.
Претходно, денеска во изјава за медиумите министерот за економија и труд Бесар Дурмиши рече дека одлуката за зголемување на минималната плата од 1.800 денари е донесена согласно законот.
Како што е познато, Трендафилов алудира на платите на функционерите кои беа зголемени во времето кога на власт беа СДСМ и ДУИ. Но, тогаш, Трендафилов и ССМ не ги зедоа мегафоните и не организираа протести иако поради тоа имаше големо незадоволство кај работниците и граѓаните.
Фото: МИА
