ТРИПУНОВСКИ: Иднината во земјоделството во Македонија, регионот и во светот е млади луѓе да започнат со земјоделско производство

Министерот за земјоделство, шумарство и водостопанство Цветан Трипуновски вели дека продолжува интензивната поддршка за модернизација на земјоделството, при што посебен акцент се става и на младите земјоделци.

– Како Министерство работиме во делот на модернизација на земјоделството, веќе се објавени низа јавни повици кои што значат стимулација на македонските земјоделци. Покрај стандардните и редовните ИПАРД објави за набавка на механизација, преку националните програми објавивме серија јавни повици, истакна министерот Цветан Трипуновски, во интервју за „Newsmax Balkans“.

Како што пренесуваат од МЗШВ, министерот посочи дека еден од највпечатливите повици е т.н. мерка 50-50, со која Министерството кофинансира набавка на модерна земјоделска механизација.

-Првиот јавен повик од националните програми кој го објавивме е во делот за набавка на механизација, тоа е познатата мерка меѓу земјоделците како 50-50, каде што кофинансираме набавка на модерна механизација, појасни министерот.

Дополнително, реализирани се и  повици за приклучна механизација, како и за набавка на современи системи за заштита на земјоделските производи од климатските промени.

– Тука би сакал да го споменам и јавниот повик за инвестиции за набавка на опрема за производство на храна од животинско и неживотинско потекло, тоа е за малите семејни бизниси. Во овој јавен повик се и инвестициите за производство на вино и алкохолни пијалоци од помал обем. Значи преку овие јавни повици даваме финансиски средства за набавка на опрема и машини кои што ќе значат модернизација и подобрување на постојните капацитети, рече министерот Трипуновски.

Тој информираше дека на јавниот повик за млади земјоделци пристигнале 254 апликации, од кои одобрени се 117.  Нагласи дека ова претставува само една од мерките што досега се реализирани, а во наредната година ќе бидат објавени и нови програми наменети за младите земјоделци.

-Клучот на иднината во земјоделското производство во Македонија, регионот и во светот е внесување на свежа енергија, односно млади луѓе кои што ќе започнат да се занимаваат со земјоделство, истакна Трипуновски.

фото: МЗШВ