Градоначалничката на Амстердам, Фемке Халсема, предложи да им се забрани на туристите да ги посетуваат градските „кофишопови“ каде што првенствено се продава и конзумира марихуаната.
Таа сака да ја намали „привлечноста на Амстердам како дестинација за туризам на мека дрога“, напиша во писмото до Градски совет.
– Во последниве години, видовме дека побарувачката за канабис во Амстердам е неверојатно зголемена, изјави Халсема во интервју за јавната телевизиска станица НОС.
– Ова главно се должи на зголемувањето на бројот на туристи, додаде таа, истакнувајќи дека некои од нив се „канабис туристи“ кои доаѓаат во Амстердам единствено да ја консумираат дрогата.
Овие „туристи“ се извор на проблеми за центарот на градот, рече градоначалничката.
-Амстердам е меѓународен град и ние ги поздравуваме туристите, но би сакале туристи кои доаѓаат поради богатството на градот, неговата убавина, културните институции, рече таа за холандската јавна телевизија.
Според податоците на Министерството за јавно здравје, Холандија има 570 „кофишопви“, а според податоците на Амстердам, во тој град има 166, или 30 отсто од сите во Холандија.
Од 1970-те, холандската влада ги толерира оние продавници што продаваат канабис, но производството и снабдувањето со канабис се, сепак, нелегални.
И додека Холандија, која е најпозната по либералноста со марихуаната планира рестрикции, во повеќе наврати актуелната власт на чело со премиерот Зоран Заев се залагаат за декриминализација на канабисот и со тоа развој на Македонија во повеќе области, меѓу кои и на туризмот. Исто така, од повеќе функционери на СДСМ и од премиерот Заев е истакнато дека со легализацијата на марихуаната Македонија годишно ќе добива околу 250 милиони евра.
