Ватикан: Папата одржа молитва за 222 загинати и 840 повредени во цунамито во Индонезија

Папата Франциско денеска се молеше за загинатите, исчезнатите и останатите без дом по цунамито што ја зафати Индонезија.

Папата пред туристите и верниците на плоштадот „Свети Петар“ во Ватикан рече дека во мислите е со индонезискиот народ, кој беше „погоден од моќна природна катастрофа“.

– Доживувам духовна блискост со тие што останаа без дом или страдаат на некој друг начин, рече папата Франциско.

Тој ги повика луѓето да покажат солидарност, а меѓународната јавност да им даде поддршка на погодените од катастрофата.

Најмалку 222 лица загинаа, а над 840 се повредени минатата ноќ при налет на цунами во крајбрежните области меѓу индонезиските острови Суматра и Јава, предизвикано од ерупција на вулканот Анак Кракатау.