Црната кампања што ја водат против мене е за да ги скријат своите криминали. Едниот континуирано ги лажеше скопјани со проекти без реализација, а вториот без око да му трепне се пазари со македонските национални интереси.

Ова го истакнува независната кандидатка за градоначалник на Скопје, Данела Арсовска, во врска со оркестрираната црна кампања што се води против неа. Ликовите што се посочени се препознатливи: градоначалникот Петре Шилегов и премиерот и претседател на СДСМ, Зоран Заев.

Арсовска во видеообраќањето до граѓаните се обраќа и до, како што нагласува, премиерот и градоначалникот во заминување, и порачува:

– Готово е, ние скопјани ве победивме!

Видеото може да го отворите ТУКА.

Го објавуваме текстот од обраќањето на Арсовска:

Почитувани скопјани,

Последниве денови сме сведоци на силна црна кампања против мене и моето семејство. Еве на крајот од оваа кампања сакам да ви се обратам директно и искрено вам, дека јас, Данела Арсовска ја побарав вашата поддршка како човек без ниту една дамка во животот и таа поддршка ја добив.

Јас за разлика од моите противници не направив никаква негативна кампања за нив. Немам потреба од такво нешто, бидејќи локалните избори треба да бидат борба на идеи и проекти на ниво на градот. За жал овие избори некој ги направи извор на лажни вести и црни кампањи.

Најавија дека сега повторно ќе бидат предмет на напади мојот татко, мајка, сопруг и дете. Тоа е и напад врз мене како нечие дете, нечија сопруга, нечија мајка.

Никој не заслужува ваква црна кампања, никој не заслужува да биде предмет на монтажи, фалсификати и продуцирани видеа за да се исмеваат со некого. Никој во оваа земја не заслужува да биде понижуван и навредуван. Затоа што тој што тоа го прави покажува ароганција и слабост. Затоа што тој што тоа го прави сака да ги скрие своите криминали и да избегне одговорност.

Сега гледам право во нив, моите противници, бидејќи сега се двајца и градоначалникот во заминување и премиерот во заминување со порака – Ќе ве победиме! Готово е!

Сега јасно и гласно кажувам – се што кажавте досега е лага. И вие тоа го знаете, ама сакате да продолжите со вашата црна кампања бидејќи немате со што друго. Едниот мој противкандидат е познат по тоа што ги излажа скопјани и во 4 години оствари само 5% од ветените проекти. А другиот по тоа што континуирано се пазари со македонските национални интереси.

Јас кажав дека лажат, побарав извинување, а добив нови напади и закани за мене и моето семејство.

Сум победила многу пострашни битки во својот живот, а ќе победам и сега бидејќи не сум човек што се откажува.

Колку е само очајно и тажно наместо да се бориш со квалитет и проекти да се бориш со лаги. Една порака и до предводниците на црната кампања – треба да знаете дека скопјани го имаат последниот збор, добив илјадници пораки и повици за поддршка да не се откажувам бидејќи проектите за скопјани ќе победат а не црната кампања.

Драги мои Скопјани,

Мора да ставиме крај на поделбите.

Мора да ставиме крај на лошото менаџирање на градот.

Скопје заслужува повеќе од ова што сега му се случува.

На нивната омраза ќе одговориме со нова надеж, промени, добри дела и одговорна работа. Промените е тука, да се здружиме сите за модерно и поубаво Скопје.

Изборен штаб на Данела Арсовска, кандидат за градоначалник на Скопје