Историски сме им направиле и сме дозволиле големи гревови кон Македонија, вели бугарскиот писател Стефан Цанев во гостувањето на бугарската национална ТВ.
Цанев смета дека омразата на луѓето од Македонија кон Бугарија има свој корен.
– Историски сме им направиле и сме дозволиле големи гревови кон Македонија. Ако тргнеме од Илинденското востание сите тогаш се надевале дека Бугарија ќе се вмеша и ќе им помогне да се ослободат. Бугарија на Турција не и испратила дури ниту протестна нота за тоа што се случило. Никаква помош. И оттогаш започнува тоа оддалечување за кое говориме, вели Цанев.
И, додава тој, не е во ред да се премолчува тоа што се случува подоцна.
– Има и чин на предавство. Ние сме направиле таен договор за поделба на Македонија со Грција и Србија. Тоа не е никаква тајна и сега фактички борбата е за српскиот дел на Македонија. Бугарскиот си е во Бугарија. Грчкиот е во Грција. И најлошото кое треба да го гледаме со отворени очи, ако е можно, е она кое сме го правеле во 1943 година кога сме ја претставувале фашистичката власт на Германија. Тоа дека ние не сме учествувале во Втората светска војна со војска не е точно. Ние учествуваме во окупацијата на Балканскиот полуостров со армија од 200.000 луѓе, вели Цанев.
Тоа се, додава бугарскиот писател, 16 дивизии, околу 50.000 војници имало во Македонија. Тој очекува бурни реакции на неговите изјави.
– Сега претпоставувам дека ме гледаат и што ќе зборуваат утре, но нека си го прочитаат дневникот на Богдан Филов, и ќе видат точно каде сме ги распоредиле тие дивизии и неговата посета на Македонија во 1943 година. Ноември, кога главното прашање е за побегнатите во планините како што тој пишува со лутина дека нашата армија јавно погубила 12 момчиња поради сомневање за соработка со побегнатите. Има многу убиени. Сфаќате ли? Зборувам со многу болка. Но, не е во ред тоа да не биде… ова е главната причина. И можеби треба да се извиниме. Не знам како тоа да се случи, вели Цанев за бугарската ТВ.
Видеото може да го отворите ТУКА.
