Пред два дена 22-годишниот Мамуду Гасама се искачи по балконите на четвртиот кат на зграда и спаси четиригодишно момче што висеше од неа, а снимката од спасувањето наскоро стана вирална.

Јавноста Малиецот веднаш го нарече парискиот Спајдермен, а францускиот претседател Емануел Макрон денес го прими во Елисејската палата и му додели државјанство на Франција и работа како пожарникар поради неговото херојство.

Но дел од јавноста почна да го поставува прашањето зошто мажот од соседниот балкон. кој веќе го држел детето за рака, не го кренал пред Гасама да успее да се качи и самиот да го подигне детето и да го префрли на безбедно, а веќе се појавија и теории дека сѐ е изрежирано за да се промовира попозитивно мислење за емигрантите.

На снимката се гледа дека, во моментот кога Гасама сѐ уште е на половина пат до момчето, на балконот до оној од кој виси детето се појавува уште еден млад маж. Тој, додека Малиецот се качува по зградата, успева да го фати детето за рака и да го повлече кон себе.

Зошто тогаш не го спасил тој, туку тоа го направил емигрантот?

Одговорот на тоа прашање е најверојатно преградата меѓу двата балкони. На снимката се гледа дека таа поприлично му пречи на мажот што е блиску до детето и дека поради неа не може да го фати. Исто така, јасно е дека не сака да го ризикува животот на момчето и да го крене во ситуација кога не може добро да го зграпчи.

Друга причина е тоа што, кога мажот успева да го фати детето за да го крене, Гасама веќе стои на балконот под оној од кој виси момчето.

Најверојатно затоа решил да причека парискиот Спајдермен, како што го нарече јавноста, да се качи на балконот каде што е детето и заедно да го кренат.

На втората објавена снимка појасно се гледа дека двајцата мажи заедно го креваат детето за сѐ да мине побезбедно, а им помага и една жена, која се појавува на соседниот балкон.