Шеснаесет зрачното македонско сонце што актуелната власт го гребеше дури и од металните шахти низ Македонија, забрефтана по патот кон „бесплатно здравство за сите во ЕУ“, сега ни го прикажува како „приказна за македонскиот денар“.

Во Музејот на Народната банка на Македонија од петок за јавноста ќе биде отворена нова времена музејска изложба, посветена на денарот и неговите обележја, поточно, на изворното културно наследство кое послужило како основа за дизајнирање на предните и задните страни на тековното издание македонски банкноти.

Изложбата се организира во знак на одбележување на 30 години од издавањето на македонскиот денар, а Музејот на Народна банка одбележува 20 години од отворањето на постојната поставка.

Раководителката на Музејот на Народната банка, Катерина Христовска, во објава на Фејсбук страната на централната банка, вели дека една од поспецифичните карактеристики на дизајнот на македонските пари, кај сите изданија, е застапеноста на дела од културното наследство на државата наспроти отсуството на историски личности на предната или задната страна, специфика која ја имаат многу малку европски држави.

– Постои една општа констатација кај истражувачите на овој вид на специфичен дизајн дека нашите пари со својот колорит, со својата динамичност се можеби едни од најубавите банкноти испечатени на европската територија, вели Христовска.

Борче Тодороски, кој ги дизајнираше првите македонски пари во сеќавање како го изработил дизајнот за првите македонски денари, вели дека својата работа ја извршувал во тајност, но со голема посветеност и пасија.

– Се работеше рачно, немаше помошни средства како сега, компјутери. Работев со перца на кои менував тушеви во боја. Многу непроспиени ноќи и многу работа, вели Тодороски.

Од Народната банка најавија дека по свеченото отворање во четврток, поставката ќе биде достапна за јавноста од следниот ден, секој работен ден од 9 до 15 часот, во следните шест месеци.

Како што е повеќепати објавувано, веднаш по потпишувањето на Договорот со Грција, властите во Македонија почнаа со отсранување на симболот Сонцето од Кутлеш што беше на македонското знаме по осамостојувањето. Во тоа лудило на власта на експремиерот Зоран Заев, забревтана кон „бесплатно здравство за сите во ЕУ“ со менување историја, македонски имиња на институции, македонски симболи… го бришеше и гребеше 16-зрачното сонце од сите јавни површини низ Македонија. Апсурдот да биде поголем, симболот со брусилици го брусеше и од металните шахти во градовите.

И сега апсурдот да биде уште поголем, власта ни приредува изложба со „спомени за македонскиот денар“ со истото тоа Сонце што го брусеше. А капак на се е тоа што бивши функционери и активни поддржувачи на политиката на „гребење“ овој настан го споделуваат на социјалните мрежи.