Меѓу приведените лица има и припадници на крајната десница и на ултра левицата.
Француската министерка за здравство Ањес Бизин изјави дека насилството што се случува во Париз е неприфатливо и оти демонстрантите во „жолти елеци“ мора да се спротистават на екстремистичките групи кои ги користат нивните легитимни поплаки.
Таа апелираше до демонстрантите да се организираат за да отпочнат дијалог со Владата.
Во исто време, лидерката на крајната десница Марин Ле Пен побара од претседателот Емануел Макрон штом се врати од Аргентина да ги прими лидерите на опозициските партии.
Таа на Твитер го осуди насилството во Париз и ги повика демонстрантите, кои протестираат поради зголемување на цените на горивото и на даноците, да се повлечат и да им овозможат на полицијата да стави крај на немирите.
Според очевици пожарникарите гаснат запалена зграда во близина на Елисејските Полиња.
Француските медиуми објавија дека на улиците можат да се видат уништени автомобили и барикади.
Во Париз денеска, трет викенд по ред избија судири помеѓу демонстрантите и полицијата.
Судирите избија кога помала група демонстранти поставија барикади на улица во центарот на Париз и запалија гуми.
Полицијата употреби солзавец против демонстрантите кои се обидоа да го пробијат безбедносниот кордон на Елисејските полиња.
Пред Тријумфална капија полицијата употреби солзавец и водени топови против „жолтите елеци“, кои фрлаа камења врз припадниците на безбедносните сили.
„Жолти елеци“ денеска повикаа на нови демонстрации и блокади на патиштата ширум Франција.
Во Движењето „жолти елеци“ учествуваат широк спектар граѓани, кои протестираат поради високите животни трошци. Тие бараат намалување на даноците, државни субвенции со цел да им се помогне на компаниите да вработат поголем број луѓе, поголеми пензии и поголема национална минимална плата.
