Премиерот Зоран Заев бара политичка и професионална одговорност од функционерите по вчерашните укажувања од Антикорупциската комисија за влијание на непотизам при одредени вработувања, а истовремено повика на итно повлекување од работните места на лицата кои биле вработени на тој начин.
Одговарајќи на новинарски прашања, Заев потенцираше дека Антикорупциската комисија покажала дека е систем и оти конечно имаме систем што функционира без оглед дали тоа им се допаѓа на политичарите или не.
– Секако секој има право на жалба, на коментар. Тоа е владеење на правото. Она што е важно е дека конечно имаме систем што функционира. Тоа може на нас политичарите да ни се допаѓа или не, Антикорупциска докажа дека е систем. Таму има конкретни коментари каде нема непотизам, а имаме и конкретни коментари каде што имало влијание за непотизам. Оттука барам повлекување и директно, како претседател на Владата, давам наредба до владините институции на лицата кои се вработени на тој начин веднаш да им се прекинат работните односи и да се повлечат назад. Барам професионална и политичка одговорност од сите нив, рече Заев.
Како што нагласи до 5-ти мај не може да разрешува министри затоа што има законска забрана.
– Поради тоа велам дека барам професионална и политичка одговорност. До 5-ти мај има забрана за разрешување и именување, изјави Заев пред почетокот на дебатата.
