Јас ви говорам за нов заеднички патриотизам каде рака за рака ќе ја создаваме нашата заедничката иднина. Без предрасуди и со заедничко почитување, порача Христијан Мицкоски, претседател на ВМРО-ДПМНЕ на денешната средба со граѓаните во општина Радовиш.
Мицкоски потенцираше дека кога говори за нов заеднички патриотизам мисли на тоа колку повеќе економски ќе напреднува државата, како и дека новиот заеднички патриотизам ќе биде кога нема да си играат властите со животите на луѓето и кога ќе има одговорност за грешките.
-Ви говорам за нов заеднички патриотизам каде ривалството во политиката ќе биде за тоа колку економски повеќе ќе ја напреднеме државата и колку повеќе проблеми ќе решиме сите заедно. Новиот заеднички патриотизам ќе биде кога нема да си играат властите со животите на луѓето и кога за грешките кои ќе ги направат политичарите ќе има одговорност. Не смееме нашата иднина да бидат болници кои горат или болници кои прокиснуваат. Светот оди напред, а нас животот ни поминува во чекалница во која никој не покажува кој е патот, додаде тој.
-Патот кој треба да го минуваме е пат поплочен сo силни предизвици, но и со нашата мудрост и заедничка сила ќе го поминеме заедно, кажа Мицкоски.
Новата иднина е на дофат, додаде тој:
Потребен е само уште еден исчекор. Уште еден значаен потег, а тоа е 31 октомври. Зад параванот за гласање вие ја имате силата, вие сте силата на Македонија, а ние сме вашиот глас во институциите кои ќе ги менуваме и затоа сме на чекор до новата иднина, рече Мицкоски.
Тој потенцираше дека новата иднина која ја ветуваат е влез во Европската Унија без уцени и пазарења од кои граѓаните ќе се срамат, односно како што вели тој без подголтнување и грутка во грлата кога ќе сведочиме за цената која сме ја платиле, како што тоа е сега.
